Неограниченото користење паметни телефони и прекумерното време поминато пред екран претставуваат закана за здравјето на младите слична на пушењето, предупреди Academy of Medical Royal Colleges во обраќање до британската влада. Како што пренесува Sky News, водечките британски лекари бараат поостри мерки за заштита на децата на интернет, додека владата размислува за можноста за забрана на социјални мрежи за лица помлади од 16 години.

Вознемирувачки содржини и зависност од екрани

Во документот се наведува дека дури 50 проценти од децата на возраст од 13 и 14 години виделе снимки со екстремно насилство на интернет, вклучително и видеа со обезглавување. Лекарите предупредуваат и на пораст на кратковидност кај тинејџерите, нарушувања на спиењето, анксиозност и социјална изолација поврзани со прекумерната употреба на телефони и социјални мрежи.

Како пример се наведуваат случаи на деца кои следеле опасни интернет-предизвици, вклучително и дете кое се предозирало со лекови по гледање видео на интернет.

„Штетната содржина постепено станува нормална“

Според лекарите, децата најчесто не бараат намерно штетна содржина, но алгоритмите постепено ја наметнуваат во нивните профили и препораки.

„Таквата содржина постепено ги презема нивните feed-ови и го нормализира екстремното однесување“, се наведува во извештајот.

Истражувањата покажуваат и дека децата првпат доаѓаат во контакт со порнографија околу 13-годишна возраст, а голем дел од нив случајно.

Лекарите бараат итни мерки

Британските медицински експерти оценуваат дека штетата од прекумерната дигитална изложеност веќе е јасно видлива и споредлива со опасностите од пушењето во минатото.

„Истото го зборувавме и за безбедносните појаси и за пушењето. Последиците беа очигледни, но општеството реагираше предоцна“, предупредуваат од Academy of Medical Royal Colleges.

Тие додаваат дека проблемот не е хипотетички, туку реален и секојдневно влијае врз менталното здравје, социјалните навики и развојот на децата и тинејџерите.