Тајландските власти отворија истрага против приватна клиника во Бангкок откако 43-годишниот британски инфлуенсер Иго Убирибо почина по третман за естетска корекција. Мртвозорникот во Лондон утврди дека смртта настапила како директна последица од инјектирање хијалуронска киселина. Случајот повторно ги отвори прашањата за ризиците од медицинскиот туризам во земјата, каде што странски државјани масовно патуваат за евтини хируршки зафати.

Инспектори од тајландското Министерство за здравство влегоа во просториите на приватната клиника во центарот на главниот град за да утврдат дали објектот поседува валидна лиценца за работа. Службениците проверуваат дали медицинскиот персонал ги почитувал сите пропишани здравствени стандарди при изведувањето на зафатот.

Паралелно со здравствените инспектори, истрага отвори и полицијата. Високиот полициски функционер во Бангкок, Утит Суџаи, потврди за агенцијата АФП дека се расчистуваат правните и кривичните околности под кои настрадал британскиот државјанин.

Според извештајот на британскиот мртвозорник изготвен во август, Убирибо веднаш по примањето на филерите заминал на масажа во близина на клиниката. Таму почувствувал силни болки во градниот кош и набрзо изгубил свест.

Бил итно префрлен во локална болница, но лекарите не успеале да го спасат. Лондонскиот патолог констатираше дека аплицирањето на хијалуронската киселина предизвикало фатални компликации во крвотокот, што довело до срцев застој на 6 март.

Убирибо, познат на Инстаграм под псевдонимите Тини и Его, имаше над 185.000 следачи каде редовно прикажуваше луксузен животен стил. Ова му била петта интервенција од ист тип во последните неколку години.

Тајланд со децении гради репутација на глобален центар за естетска хирургија поради драстично пониските цени во споредба со западноевропските клиники. Сепак, растот на нерегулирани приватни ординации создава сериозен ризик за пациентите кои немаат правна заштита во случај на лекарска грешка.