Битола беше домаќин на првата едукативна средба со физичко присуство во рамки на годинешниот „Караван на мајчинство“, иницијатива што втора година по ред ја реализираат dm drogerie markt и Здружението „Матрона“ со цел да обезбедат поддршка и едукација за идните родители.

Настанот се одржа во хотелот „Милениум Палас“, каде повеќе од 40 учесници имаа можност да разговараат со стручни лица за теми поврзани со бременоста, подготовката за породување, грижата за новороденчето и адаптацијата на семејството по доаѓањето на бебето.

Средбата беше организирана на тема „Од бременост до мајчинство: пренатална едукација и грижа за новороденчето“, а организаторите посочуваат дека целта е идните родители да добијат проверени информации и практична поддршка во период исполнет со прашања и дилеми.

Стручниот дел го водеа прим. д-р Марина Поп Лазарова, неонатолог, и дипломираната акушерка Гордана Палашовска. Тие зборуваа за подготовката пред породување, потребите на мајката по раѓањето, првичната нега на бебето, важноста на навремената едукација и психолошката поддршка за родителите.

Посебен акцент беше ставен на интерактивниот формат, кој им овозможи на присутните директно да поставуваат прашања и да споделуваат искуства. Според организаторите, токму непосредната комуникација со медицински и стручни лица придонела за атмосфера на доверба и отворен разговор.

Како дополнителна поддршка, сите учесници добија ваучери за попуст на babylove производите во dm продавниците, со што практичниот дел од настанот беше дополнет со конкретна помош за семејствата што се подготвуваат за нов член.

„Караванот на мајчинство“ минатата година се реализираше преку 11 онлајн обуки, а годинава програмата продолжува со теми поврзани со дохрана, детски сон, ран моторен развој и родителска поддршка. Од dm велат дека преку вакви иницијативи сакаат да придонесат кон поголема достапност на релевантни информации и стручна помош за семејствата низ земјава.