Во центарот на Лондон се појави нова скулптура што му се припишува на британскиот анонимен уличен уметник Бенкси.
Скулптурата, која прикажува маж во движење со знаме што му го покрива лицето, е поставена на постамент на „Ватерло плејс“ во близина на трговскиот центар во центарот на Лондон. Делото се појавило во текот на ноќта, а Бенкси подоцна го потврдил авторството, пренесува „London Evening Standard“.
Новата интервенција е поставена на сообраќаен остров, во близина на статуите на Едвард VII и Флоренс Најтингејл, како и споменикот на Кримската војна. Според британските медиуми, Бенкси наводно ја избрал локацијата затоа што „на тоа место имало празнина“, што се вклопува во неговиот препознатлив пристап кон јавниот простор.
Уметникот, чиј идентитет никогаш официјално не е потврден, е познат по политички ангажирани мурали и инсталации што често се појавуваат ненадејно на јавни места. Неговите дела редовно предизвикуваат реакции, бидејќи најчесто коментираат војни, неправда, полициска моќ, миграција и општествени поделби.
Ова е уште едно во низата неодамнешни дела на Бенкси во Лондон. Во декември 2025 година, тој призна дека стои зад две фигури што се појавија на ѕид од зграда во Бејсвотер.
Во септември, пак, внимание привлече негов мурал на кој демонстрант лежи на земја со транспарент испрскан со крв, додека судија со перика и одора се надвиснува над него со чекан во раката. Делото се појави на надворешниот ѕид на зградата во комплексот на Кралскиот суд на правдата, но брзо беше покриено и заштитено пред да почнат активностите за негово отстранување.
Дел од јавноста тогаш го протолкува муралот како коментар на апсењата на луѓе поради поддршка на палестинска акција преку транспаренти на протести.
Во март, агенцијата „Ројтерс“ објави дека го открила идентитетот на Бенкси, наведувајќи дека зад псевдонимот стои Робин Ганингем од Бристол, кој подоцна наводно го променил името во Дејвид Џонс. Сепак, идентитетот на Бенкси официјално останува непотврден.
