Цените на суровата нафта од типот Брент денеска надминаа 100 долари за барел, поттикнати од распоредувањето на трет американски носач на авиони на Блискиот Исток и прекинот на извозот на кинески горива. Како одговор на зголемувањето на цените и проблемите со снабдувањето, Франција размислува за ослободување на нафта од стратешките резерви, потврдија тројца дипломати од ЕУ, објави „Еуроњуз“ .

Париз предлага комбинирано пуштање на сурова нафта и дизел, а идејата беше презентирана на состанок на Европската комисија и земјите-членки. Состанокот следеше кратко откако францускиот претседател Емануел Макрон и американскиот претседател Доналд Трамп разговараа за глобалната енергетска ситуација.

Франција сè уште не дала официјален предлог, но сигнализираше дека е подготвена да ослободи 50 милиони барели дизел и дополнителни 50 милиони барели сурова нафта од залихите на Меѓународната агенција за енергија (ИЕА), соопштија дипломатски извори. „САД побараа 100 милиони барели, но ЕУ не го прифаќа тоа, па затоа Франција предложи формула 50 плус 50“, изјави дипломат од ЕУ.

САД го зголемуваат притисокот врз европските земји да ослободат повеќе нафта од стратешките резерви. Целта на Вашингтон е да го спречи зголемувањето на цените на горивата пред изборите за Конгресот во ноември. Во исто време, администрацијата на Трамп размислува за забрана на извозот на дизел.

Американскиот министер за енергетика веќе предложи Европската Унија да ослободи 120 милиони барели од своите резерви на пазарот во рок од три месеци, како алтернатива на забраната за извоз. Францускиот претседател Макрон претходно ја опиша евентуалната забрана на САД за извоз на дизел како катастрофална, бидејќи Франција би била меѓу најпогодените земји.

Координација на ниво на Г7 и ЕУ

По состанокот за енергија, Европската комисија објави дека Унијата е „подготвена за заедничко дејствување“. Сепак, таа нагласи дека Меѓународната агенција за енергија ќе биде задолжена за организирање на секое ослободување на залихите. Секој таков потег бара координирана акција од земјите-членки на ИЕА.

Поделбата на дизел и сурова нафта е стратешки важна бидејќи дизелот стигнува до крајните потрошувачи многу побрзо, додека суровата нафта сè уште треба да се преработи во гориво. Сè ќе биде дискутирано на видеоконференција на лидерите на групата Г7, со која моментално претседава Франција.

„Целта е да се координираат мерките што ќе помогнат во ублажувањето на притисокот врз цените и ќе се гарантира снабдувањето со сурова нафта и рафинирани производи, како меѓу членките на Г7, така и на глобално ниво“, се вели во соопштението на Елисејската палата.