Чаша вино или пиво со летен ручек делува побезопасно отколку што е. Празен стомак, топлина, недоволно течности и часови поминати на маса можат да предизвикаат пијанство многу побрзо отколку истата количина испиена навечер. Причината не е само видот на пиењето, туку начинот на кој организмот реагира на алкохол преку ден.
Денот често започнува со кафе и лесен појадок, а првиот пијалак стигнува на маса пред храната. Храната ја забавува апсорпцијата на алкохолот, па тој побавно навлегува во крвотокот. Кога се пие на празен стомак, концентрацијата на алкохол во крвта расте многу побрзо, поради што и дејството се чувствува посилно.
Црниот дроб во таа состојба им дава предност на разградувањето на алкохолот, па потешко го одржува стабилното ниво на шеќер во крвта. Тоа може да предизвика слабост, вртоглавица, треперење и чувство на дезориентираност. Затоа експертите советуваат алкохолот да се консумира дури со главниот оброк, а не пред него.
Намирници богати со сложени јаглехидрати, ориз, тестенина или интегрални житарки, како и здравите масти, ја забавуваат апсорпцијата на алкохолот и го намалуваат неговото нагло дејство.
Организмот и без алкохол губи повеќе течности преку летото поради потењето, а многумина денот го започнуваат со кафе, без доволно вода. Алкохолот дополнително го засилува губењето течности бидејќи поттикнува почесто мокрење.
Комбинацијата од високи температури и алкохол може брзо да доведе до дехидратација, со главоболка, омалаксаност, гадење и чувство на замаеност како последица. Затоа е важно за време на дружењата редовно да се пие вода, особено ако времето се поминува на сонце или подолго надвор.
Летните дружби честопати траат од ручек до доцна попладне, па многумина и не забележуваат колку всушност испиле. Она што почнало со една чаша неретко завршува со неколку пијалаци.
Кога концентрацијата на алкохол во крвта почнува да опаѓа, исчезнува и почетното чувство на опуштеност. Токму тогаш многумина несвесно нарачуваат уште еден пијалак за да го задржат истото чувство, што само го зголемува степенот на опиеност.
Целосно безбедна количина алкохол не постои, но неколку едноставни навики можат да го намалат ризикот. Експертите советуваат алкохолот да не се консумира на празен стомак, туку со оброк, а покрај секој алкохолен пијалак да се испие и чаша вода за да се намали ризикот од дехидратација.
За време на летните горештини се препорачува и ограничување на количината алкохол, бидејќи високите температури дополнително го засилуваат неговото дејство. Корисно е однапред да се одреди колку ќе се пие и планот да се почитува, а во текот на неделата да се вметнат неколку дена без алкохол. Експертите советуваат и да се избегнува истовремено консумирање алкохол и цигари.
