Куба набавила повеќе од 300 воени дронови и неодамна почнала да разгледува планови за нивна употреба во напади врз американската база во заливот Гвантанамо, американски воени бродови, а потенцијално и врз Ки Вест на Флорида, кој се наоѓа на само 145 километри од Хавана. Ова го покажуваат доверливи разузнавачки документи во кои увид имал американскиот портал „Аксиос“.
Предупредување од Вашингтон
Разузнавачките информации, кои би можеле да послужат како оправдување за американска воена акција, покажуваат колку администрацијата на американскиот претседател Доналд Трамп ја доживува Куба како закана поради развојот на беспилотните летала и присуството на ирански воени советници во Хавана, изјавил висок американски функционер.
„Кога ќе се земе предвид дека таква технологија се наоѓа толку блиску, заедно со терористички групи, нарко-картели, Иранци и Руси, тоа е сериозна причина за загриженост“, рекол функционерот. „Станува збор за растечка закана.“
Како одговор на тоа, директорот на ЦИА, Џон Ретклиф, минатиот четврток отпатувал во Куба и директно ги предупредил кубанските власти да не преземаат непријателски активности. Според претставник на ЦИА, тој исто така ги повикал да се откажат од, како што рекол, „тоталитарното владеење“ за да се укинат американските санкции.
„Директорот Ретклиф беше јасен: Куба повеќе не може да служи како платформа од која нашите противници ќе спроведуваат непријателски планови во западната хемисфера“, изјавил претставникот за „Аксиос“.
Се засилува притисокот врз Хавана
Американското Министерство за правда планира оваа среда да објави обвинение против поранешниот кубански лидер Раул Кастро поради наводна вмешаност во соборувањето авион во 1996 година, управуван од хуманитарната организација „Брадерс ту д Рескју“ од Мајами.
Во текот на неделата се очекуваат и дополнителни санкции против Куба. Кубанските власти засега не дале официјален коментар.
Според американски функционери, Куба од 2023 година набавува нападни дронови од Русија и Иран и ги складира на стратешки локации низ островот.
Русија и Иран во фокусот
Висок американски претставник изјавил дека кубанските власти во последниот месец побарале дополнителни дронови и воена опрема од Русија. Пресретнати разузнавачки податоци покажале и дека кубанските служби „се обидуваат од Иран да научат како да им се спротивстават на САД“.
Познато е дека Русија и Кина имаат високотехнолошки шпионски станици на Куба за електронско собирање разузнавачки податоци.
Американскиот министер за одбрана Пит Хегсет изјавил дека САД одамна се загрижени поради присуството на странски противници толку блиску до американските брегови.
Стравувања поради искуствата од Украина и Блискиот Исток
Загриженоста во Вашингтон дополнително пораснала откако Иран интензивно почнал да користи дронови во конфликтите на Блискиот Исток. Американските власти сметаат дека околу 5.000 кубански војници се бореле на страната на Русија во војната во Украина, а дел од нив ги информирале кубанските воени лидери за ефикасноста на војувањето со беспилотни летала.
„Тие се дел од машинеријата на Владимир Путин. Учеле за иранските тактики. Тоа е нешто за кое мора да бидеме подготвени“, изјавил американски функционер.
САД не веруваат во непосреден напад
И покрај алармантните проценки, американските власти не веруваат дека Куба во моментов претставува непосредна воена закана или активно подготвува напад врз американски интереси. Според разузнавачките информации, кубанските воени лидери само разгледувале можни сценарија за употреба на дронови во случај на иден конфликт со САД.
„Никој не стравува од кубански борбени авиони. Не е сигурно ни дали имаат функционални летала“, рекол висок американски претставник. „Но фактот дека се на само 145 километри од нас е реалност што не ни е пријатна.“
