Товарен воз излета од шините во регионот Архангелск во северозападна Русија откако се урна железнички мост, соопштија Руските железници и локалните власти, предизвикувајќи големи прекини во патничкиот железнички сообраќај на тој дел.
Гувернерот на Архангелската област, Александар Цибулски, изјави дека инцидентот се случил околу 5:10 часот наутро по локално време (3:10 часот наутро по македонско време). Според него, дел од железнички мост над реката Вилед се срушил, што предизвикало неколку товарни вагони да излезат од шините.
Цибулски рече дека надлежните служби координираат итна интервенција. Никој не е повреден во инцидентот. Најмалку осум патнички возови на долги релации, вклучувајќи ги и оние што ги поврзуваат големите градови како Москва и Санкт Петербург, останаа блокирани.
Руските железници соопштија дека испратиле автобуси на местото на настанот за да им овозможат на патниците да го продолжат своето патување до нивната дестинација. Екипи за поправка беа испратени на оштетениот мост, но претставниците на компанијата не прецизираа колку долго може да биде прекинат сообраќајот на тој дел. Гувернерот Цибуљски потврди дека полицијата и другите надлежни служби ја истражуваат причината за уривањето на мостот.
Украинските саботери не ја презедоа одговорноста.
Неколку часа по уривањето на мостот во регионот Архангелск, украинска саботажна група објави на Телеграм криптична порака во која се потсмева на руските власти. Од почетокот на руската инвазија на Украина во февруари 2022 година, имало бројни случаи на саботажи извршени од проукраински партизани длабоко зад руските линии.
Меѓу нив се и членови на движењето „Атеш“, чие име значи „оган“, а кои денес објавија порака: „Мостовите нема да се урнат само во Архангелската област. Ние набљудуваме… И веднаш ќе ги предвидиме бирократите на Путин и нивните објаснувања: секако, сето ова се случува „случајно“, исклучиво поради технички дефекти“.
Групата не ја презеде одговорноста за уривањето на мостот во соопштението. Според руските регионални претставници, товарните вагони што излегоа од шините биле празни и не било истурено гориво.
