На денешен ден пред 122 години, во Софија, е објавена книгата „За македонцките работи“ од македонскиот публицист и лингвист Крсте Петков Мисирков – капитално дело што ја поставува основата на современата македонска национална и јазична мисла.

Во време на силни политички и идентитетски притисоци, Мисирков со јасен, аргументиран и визионерски пристап ја афирмира посебноста на македонскиот народ, македонскиот јазик и македонската култура. Книгата претставува храбар интелектуален чин, со кој македонското прашање за првпат е систематски разработено од внатрешна, македонска перспектива.

„За македонцките работи“ не е само историски документ, туку и политичко-културен манифест што го надминува своето време. Таа останува темел врз кој подоцна ќе се гради кодификацијата на македонскиот јазик и институционалното признавање на македонскиот идентитет.

Денес, 122 години подоцна, делото на Мисирков сведочи дека македонската самобитност не е продукт на момент, туку резултат на свесна мисла, напишана со знаење, визија и храброст.