Двата силни земјотреси што во краток временски интервал ја погодија Венецуела, со магнитуда од 7,2 и 7,5 степени според Рихтер, се резултат на сложени тектонски процеси во еден од сеизмички најактивните региони во светот. Според податоците на Американскиот геолошки институт (USGS), Венецуела се наоѓа на границата меѓу Карипската и Јужноамериканската тектонска плоча. Токму движењето и меѓусебниот притисок на овие огромни геолошки структури редовно предизвикуваат силни земјотреси во регионот.

Експертите објаснуваат дека посилниот од двата потреси бил предизвикан од таканаречено плитко хоризонтално раседување. Станува збор за процес при кој делови од земјината кора се движат странично еден покрај друг. Кога ова движење се случува нагло, се ослободува огромна количина енергија која предизвикува разорни потреси.

Според сеизмолозите, ваквите земјотреси не се ограничени на една точка, туку опфаќаат поширока зона на расед долж која доаѓа до лизгање на карпестите маси. Токму затоа последиците можат да бидат сериозни на голема територија.

Фактот што Каракас бил погоден од два силни потреси во интервал од само неколку секунди укажува на сложен процес на пукање и активирање на повеќе сегменти од раседот. Научниците предупредуваат дека ризикот сè уште не е поминат и дека во наредните денови се можни дополнителни последователни потреси. Властите ги повикаа граѓаните да останат внимателни, да избегнуваат оштетени објекти и да ги следат препораките на службите за итни случаи додека траат проценките на штетите и спасувачките операции.