Здружението на новинарите на Македонија бара Министерството за внатрешни работи итно да постапи по заканите по животот, повиците за насилство и етнички заснованите навреди упатени кон новинарот и колумнист Ерол Ризаов.

Од ЗНМ изразија сериозна загриженост поради коментари објавени на неговата официјална Фејсбук-страница, на објава што води до колумната за „Независен.мк“ со наслов „Додека умира надежта за поубаво утре“.

ЗНМ: Коментарите содржат експлицитни повици за насилство

Од ЗНМ посочуваат дека дел од коментарите содржат експлицитни повици за физичка елиминација и смрт на Ризаов.

Како што наведуваат од здружението, во еден од коментарите се повикува на насилство, додека во друг се поставува прашање дали има некој „да го реши“ Ризаов. Дополнително, во коментарите биле упатени и етнички засновани навреди кон новинарот.

Барање до МВР да ги зачува електронските докази

Од ЗНМ очекуваат МВР итно да ги обезбеди и зачува електронските докази, да ги утврди идентитетите на лицата кои стојат зад профилите и да процени дали во конкретниот случај постојат елементи на кривични дела.

„Очекуваме МВР итно да ги обезбеди и зачува електронските докази, да ги утврди идентитетите на лицата кои стојат зад профилите и да процени дали во конкретниот случај постојат елементи на кривични дела поврзани со закани, поттикнување или повикување на насилство и говор на омраза. Бараме, доколку се утврдат такви елементи, случајот без одлагање да биде доставен до надлежното јавно обвинителство“, се вели во соопштението на ЗНМ.

Заканите кон новинарите не смеат да се игнорираат

Од здружението апелираат заканите кон новинарите поради нивната работа да не се игнорираат.

Според ЗНМ, ваквите закани претставуваат сериозен удар врз слободата на изразување, а институциите мора да реагираат навреме за да спречат заканите да прераснат во насилство.