Детектираните 14 ppb арсен во водоводот во Валандово се за 40 отсто над дозволениот праг на Светската здравствена организација, но не создаваат опасност од акутно труење. Клиничкиот токсиколог Нико Беќаровски порачува дека водата во Валандово е токсиколошки безбедна за техничка употреба и туширање, а кусата консумација од неколку дена или недели нема да предизвика здравствени симптоми кај населението.

Водата со измерено ниво од 14 ppb арсен е безбедна за туширање, миење и техничка употреба. Вриењето на водата или употребата на стандардните домашни филтри за чешми нема да ја намали концентрацијата на овој хемиски елемент.

Акутно труење со арсен настапува при дози кои се илјада пати повисоки од регистрираните во валандовскиот водовод. Поради тоа, граѓаните немаат потреба од итни лекарски прегледи. Краткорочното конзумирање од неколку дена до неколку недели не претставува здравствен ризик за најголемиот дел од населението и нема да предизвика симптоми.

Проблемот со арсенот се појавува при хронично пиење на ваква вода во тек на повеќе години или децении. Тогаш може да настапат знаци на хронично труење.

Меѓу симптомите се темни пеги на кожата, задебелување на дланките, хипертензија, инсулинска резистенција и трнење на рацете поради неуритис. Арсенот е класифициран во првата група канцерогени супстанции, што го зголемува ризикот од рак на мочниот меур, бубрезите, кожата и белите дробови.

Беќаровски истакнува дека нема потреба од паника, но доколку резултатите континуирано покажуваат високи вредности, надлежните мора да ја пронајдат причината или да обезбедат алтернативен извор на вода за пиење. Наместо да се тврди дека лабораторискиот резултат е погрешен, неопходно е да се бара изворот на контаминација.