Турските власти привеле повеќе од 100 лица кои учествувале на протест против НАТО, организиран од Комунистичката партија на Турција (ТКП), во пресрет на претстојниот самит на Алијансата, јавуваат локални медиуми. Протестот бил одржан во Анкара, каде што стотици демонстранти марширале кон централниот плоштад Кизилај, и покрај забраната за собирања и засилените безбедносни мерки.

Полицијата употреби солзавец

Според соопштението на ТКП, приведени се повеќе од 100 членови на партијата. На снимки објавени на социјалните мрежи се гледа како дел од демонстрантите извикуваат слогани против НАТО, додека полицијата користи солзавец за растерување на толпата.

Во Истанбул истовремено се одржал друг протест, исто така организиран од ТКП, каде стотици лица марширале од плоштадот Таксим кон Долмабахче. И покрај силното полициско присуство, таму немало поголеми инциденти.

Засилени мерки пред НАТО самитот

Турција ќе биде домаќин на лидерите на 32 сојузнички земји на претстојниот НАТО самит во Анкара, поради што властите вовеле строги безбедносни мерки, вклучително забрана за протести, блокади на улици и оградување на делови од градот. Покрај протестите, во одделни антитерористички акции низ земјата се приведени уште 39 лица, меѓу кои новинари, активисти и универзитетски професори, јавуваат медиумите.