Фестивалот Виноскоп, кој со години важи за едно од најпрепознатливите урбани случувања, оваа пролет повторно ја носи својата енергија во Градски парк Скопје, каде од 13 до 17 мај ќе се одржи петдневна програма исполнета со музика, вино и гастрономија.
Настанот ќе се одржи во делот Школка, а ќе обедини домашни музички имиња, диџеи и бендови, заедно со селекција на вина од македонски винарии и разновидна гастрономска понуда.
Програмата започнува во среда, 13 мај, од 18:00 часот, со настапи на Александар Јорданов, Happy End Band и Либеро Бенд.
Во четврток, 14 мај, исто така од 18:00 часот, на сцената ќе настапат DJ Марио, Виа Скопје и Куку Леле.
Петок, 15 мај, носи продолжена вечерна програма од 17:00 до 01:00 часот, со настапи на Карлито, Здравев Мјузик, Огнен и Пауза за ракија, во вечер замислена како загревање за викендот.
Сабота, 16 мај, е резервирана за целодневно фестивалско искуство со почеток од 12:00 часот, под концептот „Блуз и вино“ – бранч. Публиката ќе може да ужива во настапите на DJ Бела, Мијата, Камерен оркестар и Пасио Бенд.
Фестивалот завршува во недела, 17 мај, со дневна програма од 12:00 до 18:00 часот и настап на DJ Гоце Саф, како опуштена завршница на петдневното издание.
Покрај музиката, посетителите ќе имаат можност да уживаат во внимателно одбрана понуда на вина од домашни винарии, како и во разновидна храна, што го прави Виноскоп повеќе од фестивал – вистинско урбано искуство.
Со ова издание, Виноскоп го најавува почетокот на сезоната на настани на отворено, комбинирајќи музика, гастрономија и дружење во пролетен амбиент.
