Македонската винарија Душа деновиве создава професионални искуства токму таму каде традицијата и иновацијата живеат заедно, во најпрестижната винска долина Напа во Калифорнија, САД.
Има вински региони што ги посетуваш како турист и има места што ги доживуваш како школа. За Емилија и Небојша Димиќ, основачи на винарија Душа, Напа Вали е токму тоа – простор каде што секоја визба, секој архитектонски детаљ и секое гостопримство зборуваат за еден ист принцип: квалитетот не е случаен, туку внимателно изграден систем. Напа Вали ја добил својата официјална AVA ознака во 1981 година, но неговата глобална тежина се темели на многу подолга историја на вложување, препознатлив стил и силна винска култура.
Во овој регион, кој за многумина е синоним за американска винска извонредност, основачите од Душа не бараат само инспирација, туку и одговори. Како се гради винарија што луѓето ја паметат? Како се создава вино што не се мери само по вкус, туку и по впечаток, амбиент и приказна?
„Во Напа најмногу нѐ импресионираше фактот што ништо не е оставено на случајност. Од лозјето до начинот на кој ве пречекуваат. Тоа е култура на квалитет што се чувствува на секој чекор“, велат Емилија и Небојша Димиќ, основачи на винарија Душа.
Една од станиците што оставила најсилен впечаток е Beringer, винарија чија историја практично се чита како хроника на Напа.
Според самата винарија, Џејкоб Беринџер пристигнал во Калифорнија во 1869 година, а со брат му Фредерик во 1875 година го купиле имотот што станал срце на Beringer Estate, а првото берење и првото гмечење ги направиле во 1876 година.
Подоцна, во периодот по Прохибицијата, Beringer станала првата винарија во регионот што понудила јавни тури, со што буквално помогнале да започне традицијата на вински туризам во Напа.
Токму во таа спојка меѓу историја и визија, македонската Винарија Душа препознава дел од сопствениот пат. „Кога стоите на такво место, разбирате дека големите вински куќи не се само производители на вино. Тие создаваат наследство, доживување и доверба. Тоа е многу блиску до она што сакаме да го градиме и дома, во Македонија“, велат Емилија и Небојша Димиќ.
Напа, секако, не им оставила впечаток само со минатото, туку и со начинот на кој го живее сегашниот момент. Таму виното не е одвоено од архитектурата, гастрономијата, туризмот и услугата. Секој елемент е дел од една поширока целина што му дава смисла на производот. Токму таа поврзаност, според основачите на Душа, е можеби најважната лекција од посетата.
„Ова патување уште повеќе нѐ увери дека иднината на македонското вино е во автентичноста, но и во отвореноста да учиме од најдобрите. Не за да личиме на некого, туку за уште појасно да станеме свои“, велат Емилија и Небојша.
