Генерацијата Зи носи голема промена во начинот на кој луѓето ги планираат, резервираат и споделуваат своите одмори. Повеќе од четириесет и осум проценти од младите родени меѓу 1997 и 2012 година го користат ТикТок како главен извор на инспирација за патувања. Со тоа, оваа платформа го претекна традиционалниот препорачан збор од пријателите и семејството, кој досега беше на првото место.
Истражувањето спpоведено од компанијата ТУИ Мјузмент во Шпанија, Италија и Обединетото Кралство покажува дека содржината на социјалните медиуми има огромно влијание врз изборот на дестинации. Четири од десет патници потврдиле дека гледањето видео директно ги поттикнало да резервираат патување или одредена активност.
Овој тренд е посебно изразен кај миленијалците, каде што дури 52 проценти донеле одлука за патување врз основа на видео објавено на социјалните мрежи. Инфлуенсерите исто така играат клучна улога во изборот на дестинации. Околу 43 проценти од испитаниците изјавиле дека креаторите на содржини што ги следат влијаат врз нивните одлуки.
Дури 27 проценти од патниците отишле чекор понатаму и целосно ја промениле планираната дестинација поради препорака од некој инфлуенсер. Влијанието на социјалните мрежи не завршува со самиот избор на местото за одмор. Тоа продолжува и за време на престојот на самата локација.
Над една третина од патниците чувствуваат притисок нивниот одмор да изгледа повозбудливо на нивните профили на Инстаграм или ТикТок. Кај генерацијата Зи, овој процент се искачува на речиси 45 проценти. Потрагата по совршена фотографија директно ги менува и самите активности на туристите.
Речиси четири од десет патници признаваат дека посетиле одредена туристичка атракција исклучиво за да направат фотографија или видео за социјалните мрежи. Покрај тоа, 37 проценти од нив изјавиле дека почесто избираат познати локации од социјалните мрежи наместо да ги истражуваат скриените и помалку познати места.
Овие податоци го отвораат прашањето дали суштината на патувањето сè уште е во самото доживување или во тоа како тоа ќе изгледа на социјалните мрежи.
