Пред 94 години, на 6 август 1932 година, на терасата на хотелот „Екселсиор“ на островот Лидо во Венеција беше отворен првиот Венециски филмски фестивал. Со тоа започна приказната за најстариот филмски фестивал во светот, кој денес важи за едно од најпрестижните собиралишта на филмската индустрија. 

Во текот на речиси еден век, фестивалот прерасна во место каде што своите премиери ги имаа некои од најзначајните филмски остварувања, а наградата „Златен лав“ стана едно од најценетите признанија во светот на кинематографијата. Фестивалот е дел од Венециското биенале и секоја година ги собира најголемите режисери, актери, продуценти и филмски критичари од целиот свет. 

Годинашното, 83. издание на фестивалот ќе се одржи од 2 до 12 септември на Лидо, со богата програма од филмови во конкуренција и специјални проекции. За претседателка на главното жири е избрана американската актерка и режисерка Меги Џиленхол. 

Венецискиот фестивал низ децениите одигра клучна улога во афирмацијата на европскиот и светскиот авторски филм. Освен што е место каде што се откриваат нови автори, тој често претставува и почетна станица за филмовите кои подоцна освојуваат престижни награди, вклучувајќи ги и Оскарите. 

И покрај промените во филмската индустрија и растечката конкуренција од стриминг платформите, Венецискиот фестивал и натаму го задржува статусот на еден од најважните светски филмски настани. Организаторите оценуваат дека неговата улога останува непроменета – промоција на врвната кинематографија и откривање нови филмски гласови.