Најмалку тројца луѓе загинаа во голем украински напад со дронови врз Москва и Московската област, соопштија руските власти. Според Reuters, нападот бил еден од најголемите врз руската престолнина во последната година, а руската противвоздушна одбрана во текот на ноќта пресретнала десетици беспилотни летала.

Гувернерот на Московската област Андреј Воробјов соопштил дека три лица загинале во регионот, меѓу нив жена во Химки и двајца мажи во селото Погорелки. Во други напади со дронови биле повредени најмалку 12 лица, а оштетени се станбени објекти и делови од инфраструктурата.

Руското Министерство за одбрана тврди дека во текот на ноќта и утрото биле соборени вкупно 556 украински дронови над повеќе региони во Русија. Само околу Москва, според руските власти, биле пресретнати 81 дрон, додека дел од остатоците паднале и во близина на аеродромот Шереметјево.

Градоначалникот на Москва, Сергеј Собјанин, изјавил дека нападот ја погодил и зоната околу московската нафтена рафинерија, но дека клучната технологија на објектот не била оштетена. Руските власти засега не соопштуваат целосен обем на материјалната штета.

Нападот доаѓа во период на засилена размена на удари меѓу Киев и Москва, откако Украина најави одговор на неодамнешните руски напади врз Киев и други украински градови. Guardian пишува дека повеќе од 500 дронови биле насочени кон Русија, додека тензиите се зголемуваат по прекинот на примирјето и размената на затвореници