Повеќе од половина од украинските бегалци кои моментално се во Европа би можеле да останат таму најмалку до крајот на 2029 година, покажува проценката на Високиот комесаријат на Обединетите нации за бегалци, UNHCR.

Според едно од сценаријата на UNHCR, доколку војната влезе во фаза на „кршлив мир со отстапки“, при што Русија би ја задржала контролата врз окупираните територии, 2,9 милиони украински бегалци, односно 56 отсто од нивниот сегашен број, би останале во Европа најмалку до 2029 година.

Проценката се темели и на претпоставката дека привремениот статус на заштита за украинските бегалци во Европската Унија ќе заврши во март 2027 година. UNHCR нагласува дека овие сценарија не се предвидување, туку анализа на тоа како би можело да се менува однесувањето на бегалците во зависност од развојот на војната и условите за враќање.

Ако војната продолжи, речиси сите би останале

Второто сценарио што го разгледува UNHCR е статус кво, односно продолжување на руската агресија. Во таков случај, до крајот на 2029 година во Европа би останале 5,16 милиони украински бегалци, што е 99 отсто од нивниот сегашен број.

Во третото сценарио, кое предвидува украинска победа и враќање на окупираните територии до крајот на годината, бројот на бегалци што би останале во Европа би се намалил на 32 отсто.

Безбедноста и домот се клучни за враќање

UNHCR наведува дека Европа и понатаму е главен домаќин на раселени и лица без државјанство, а до крајот на 2025 година таму имало повеќе од 20 милиони такви лица, меѓу кои и 5,2 милиони бегалци од Украина. Од почетокот на руската инвазија во февруари 2022 година, повеќе од 6,8 милиони луѓе ја напуштиле Украина, додека милиони остануваат внатрешно раселени.

Иако повеќето украински бегалци изразуваат желба еден ден да се вратат дома, несигурноста, нападите врз цивилна инфраструктура, недостигот на домување и можности за работа остануваат главни пречки за враќање.