Украинските сили тврдат дека извршиле силен напад врз руски воен објект во окупираната област, каде што бил уништен центар за обука и производство на дронови. Според соопштение од новоформираните украински сили за беспилотни системи (USF) и Службата за безбедност на Украина (SBU), цел на нападот бил комплекс кој се користел за обука на оператори со беспилотни летала и за склопување борбени делови.

Во нападот, како што тврди Киев, биле уништени работилници, опрема, муниција и неколку оклопни возила тип „Тигар“, кои биле во објектот на поправка.

Украинската страна наведува дека во операцијата загинале најмалку 65 руски војници, меѓу кои и командантот на центарот, додека биле изведени повеќекратни прецизни удари со беспилотни летала. Операцијата, според украинските воени претставници, е дел од поширока кампања со која се таргетираат руски воени позиции и логистика длабоко на окупираните територии.

Киев тврди дека ваквите напади значително ја нарушуваат обуката и снабдувањето со дронови на руските единици на фронтот.