Полскиот премиер Доналд Туск предупреди дека новата политичка криза меѓу Полска и Украина може сериозно да им наштети на двете земји, оценувајќи дека ваквиот судир е „стратешка грешка“ со последици врз економијата, геополитиката и меѓународниот углед. Тензиите меѓу Варшава и Киев повторно се разгореа по одлуката на полскиот претседател Карол Навроцки да го одземе највисокото државно одликување што претходно му беше доделено на украинскиот претседател Володимир Зеленски.

Одлуката следеше откако во Полска се појавија реакции поради преименувањето на една украинска воена единица по Украинската востаничка армија (УПА) – националистичко движење чии припадници се обвинети за масакри врз полското население за време на Втората светска војна.

Како одговор, тројца поранешни украински претседатели и повеќе високи функционери ги вратија своите полски државни одликувања. Туск, кој повторно стана премиер во 2023 година откако неговата проевропска коалиција ја порази националистичката партија Право и правда (ПиС), со која политички е поврзан Навроцки, повика на смирување на реториката.

„Влегувањето во конфликт меѓу политичарите во Полска и Украина е стратешка грешка што ќе им наштети на двете страни – економски, геополитички и во поглед на угледот. Во политиката, како што знаеме, грешката понекогаш е полоша и од злосторство“, напиша Туск на социјалната мрежа Икс.

Тој додаде дека во разговорите со европските партнери се обидува да ја намали штетата и да ги ублажи тензиите, но призна дека тоа не е лесна задача.Во меѓувреме, Зеленски порача дека Украина и Полска немаат друга опција освен да останат блиски партнери и пријатели.

„Политичкиот конфликт може да доведе до многу опасна ескалација. Нашите војници сами го избираат името на својата единица, а јас како претседател и врховен командант морам да ги поддржам“, изјави украинскиот лидер.

Зеленски нагласи и дека без Украина одбраната на Полска би била значително потешка.

„Без Украина никој нема да може да ја брани Полска. Тоа е едноставно невозможно“, рече тој.