Во Музејот на современата уметност – Скопје, в сабота ќе се одржи ново издание на „МСУ Водич и матине“, програмата што ги спојува уметноста, кустоското водење и музиката. Кустосот Бојана Јанева ќе ги прошета посетителите низ трите актуелни изложби, а за музичкиот избор ќе се погрижи Дарко Марковски.

Посетителите ќе имаат можност да ги разгледаат изложбите „Благоја Маневски: 40 години творештво“, „Пикасо – сликата на Музејот“ и „Солидарноста како иднина“.

Четири децении уметничко истражување на Благоја Маневски

Ретроспективната изложба на Благоја Маневски го следи неговиот творечки пат од 1985 до 2025 година. Станува збор за четири децении истражување, промени и поместување на границите меѓу различните уметнички медиуми – од сликарството и цртежот до објектот, инсталацијата, фотографијата, амбиентот и хепенингот.

Куратори на изложбата се Лилјана Неделковска и Натали Рајчиновска-Павлеска, а координатор на проектот е Благоја Варошанец.

Пикасо и делото што стана симбол на МСУ

Изложбата „Пикасо – сликата на Музејот“ претставува избор од колекцијата на Музејот на современата уметност. Во нејзиниот фокус е делото „Глава на жена“ од 1963 година на Пабло Пикасо, кое со текот на времето прераснало во еден од препознатливите визуелни симболи на музејот.

Сликата е создадена во период кога Пикасо веќе бил една од централните фигури на европската и светската модерна уметност. Во Скопје, таа добива и сопствена локална историја, поврзана со музејската колекција и со специфичната приказна за институцијата.

Куратори на изложбата се Благоја Варошанец, Владимир Јанчевски и Ива Димовски.

Солидарноста како уметничка и општествена идеја

Третата изложба, „Солидарноста како иднина“, обединува значајни дела од постојаната колекција на МСУ – Скопје, создадени од француски, македонски и други европски уметници. Меѓу застапените автори се Пјер Сулаж, Виктор Вазарели и Никола Мартиноски.

Изложбата ја отвора темата за солидарноста преку уметнички дела што поврзуваат различни автори, културни контексти и уметнички пристапи. Куратори се Благоја Варошанец, Владимир Јанчевски и Ива Димовски.

„МСУ Водич и матине“ е поддржано од винаријата „Тиквеш“, а координаторка на настанот е Анжелика Апсис. Влезниците чинат 150 денари.