Доналд Трамп најави дека секој полнолетен американски граѓанин би можел да добие по 5.000 долари доколку републиканците ја задржат контролата врз Претставничкиот дом и Сенатот на конгресните избори во ноември. Трамп ветувањето го даде во Далас, на првата конвенција на Републиканската партија посветена на изборите на половина од претседателскиот мандат. Тој ја нарече исплатата „Трампова дивиденда“ и рече дека парите би морале да се потрошат во САД.
„Ако републиканците го освојат Претставничкиот дом и Сенатот – двата дома – поради нашата огромна економска сила и успех, ќе исплатам дивиденда од 5.000 долари на секој полнолетен граѓанин на САД“, изјави Трамп.
Сепак, не е јасно како би се спровела ваквата програма, ниту дали за неа постои законска основа. Според проценките цитирани од „Ројтерс“, во САД има околу 270 милиони полнолетни жители. Доколку сите ги добијат средствата, вкупната цена би изнесувала околу 1,35 трилиони долари.
Трамп изборите ги претвора во референдум за својата политика
Во говорот во Далас Трамп повторно се стави во центарот на кампањата за конгресните избори, фалејќи се со, како што ги нарече, „двете најдобри години во историјата на претседателската функција“.
Но, според анализата на „Ројтерс“, не е извесно дали ваквиот предизборен настап ќе им помогне на републиканците кај неопределените гласачи. Анкетите покажуваат дека незадоволството поради зголемените трошоци за живот и војната со Иран влијае врз поддршката за партијата. Трамп предупреди дека победа на демократите би била опасна за иднината на земјата и ги повика Американците да гласаат за републиканците.
„Ако ѝ ја препуштиме иднината на Америка на радикалната левица на демократите, на нашата земја ќе ѝ треба целата следна деценија само повторно да застане на нозе“, порача тој.
Дводневната конвенција во Далас, која Трамп треба да ја заврши со свој говор по обраќањето на потпретседателот Џеј Ди Венс, ја покажува тесната поврзаност меѓу републиканската партија и актуелниот претседател во пресрет на изборите закажани за 3 ноември.
Трамп ја брани воената акција против Иран
Американскиот претседател во говорот ја бранеше и одлуката за напад врз Иран. Според него, целта била да се спречи Техеран да развие нуклеарно оружје. Трамп истовремено вети дека цените на нафтата ќе паднат „штом ја добиеме војната со Иран“, за која тврди дека ќе заврши наскоро.
Тој упати и ново предупредување до Техеран во врска со локацијата Пикекс Маунтин, каде што, според американските тврдења, под земја се работи на нуклеарни капацитети. „Гледаме одредени активности на локацијата Пикекс. Би го советувал Иран да не прави никакви трикови, бидејќи ќе мора многу силно да ги погодиме“, изјави Трамп.
Републиканците со остри напади врз демократите
Другите говорници на републиканската конвенција главно ја насочија реториката кон демократите, обвинувајќи ги за радикални ставови околу безбедноста на границата и учеството на трансродови жени во спортот.
Некои од говорниците ги нарекуваа демократските политичари социјалисти и комунисти, додека сенаторот Тим Скот од Јужна Каролина ги опиша како „опасни, радикални и чудни“.
