Американскиот претседател Доналд Трамп во интервју за „Фокс њуз“ изјави дека Вашингтон подготвува силен економски удар врз Иран, со цел да го принуди Техеран да попушти по речиси шест месеци војна.

Во меѓувреме, повремените судири продолжуваат да го нарушуваат протокот на нафта и други стратешки суровини низ Ормускиот Теснец. Иран и САД меѓусебно се обвинуваат за недоверливост во преговорите, додека Техеран презема мерки за задржување на контролата врз клучниот пловен пат.

„Нешто што никогаш претходно не сме го виделе“

Трамп во петокот ја пофали американската блокада на иранските пристаништа, нарекувајќи ја „челичен ѕид“ што, според него, му овозможува на Вашингтон вистинска контрола врз пловниот пат.

Иран, од друга страна, тврди дека и натаму сам управува со сообраќајот низ теснецот.

Американскиот министер за финансии Скот Бесент најави дека дополнителните економски мерки против Иран ќе бидат објавени следната недела.

Тој ги опиша како нешто „што никогаш претходно не сме го виделе во историјата на економската изолација на една држава“, но не откри детали за конкретните мерки.

Можно воведување секундарни санкции

Иранската економија веќе е под силен притисок. Голем дел од индустриските капацитети се оштетени, а извозот на сурова нафта е сериозно ограничен поради американската блокада.

Сепак, досегашните санкции не го натераа Техеран да се откаже од нуклеарната програма или од своите позиции околу Ормускиот Теснец.

Една од можностите што се разгледуваат се секундарни санкции против купувачите на иранска нафта, меѓу кои и Кина. Таквиот потег би можел да предизвика реакција од Пекинг и дополнително да ја зголеми неизвесноста на светските енергетски пазари.

Според податоците на Џереми Панер од адвокатската канцеларија „Хјуз Хабард енд Рид“, САД од 2018 година вовеле околу 2.200 санкции против иранскиот нафтен и петрохемиски сектор.

Анализата на „Блумберг економикс“ оценува дека дополнителните мерки можеби нема суштински да ја променат позицијата на Техеран, имајќи предвид дека децениските санкции досега не го принудиле Иран да отстапи од своите клучни позиции.

Ормускиот Теснец останува клучна точка на спорот

Во меѓувреме, Иран ги реорганизира вооружените сили и зазема поагресивен став во странство, додека преговорите за завршување на конфликтот и натаму се во ќор-сокак.

Ормускиот Теснец останува една од главните точки на спорот. Пред војната, низ него минувала приближно една петтина од светската трговија со нафта и природен гас.

Иран и Оман веќе подолго време преговараат за воспоставување поморски пат низ теснецот, но САД не се дел од тие разговори.