Американскиот претседател Доналд Трамп повторно се огласи преку својата социјална мрежа, тврдејќи дека Иран е заинтересиран за постигнување договор со САД, истовремено упатувајќи остри критики кон своите политички противници.

„Зарем демократите и некои таканаречени непатриотски републиканци не разбираат дека ми е многу потешко да ја работам својата работа и да преговарам кога постојано ме напаѓаат и коментираат што треба да направам? Само седнете, опуштете се, на крајот сè ќе заврши добро, секогаш завршува добро“, напиша Трамп.

Без коментар за најновите напади

Во својата објава Трамп не го спомена најновиот ирански напад врз цели во Кувајт, ниту американските воздушни напади врз цели во Иран што беа изведени во текот на викендот. Неговата порака доаѓа во момент кога ситуацијата на Блискиот Исток останува исклучително напната, а дипломатските напори за постигнување договор меѓу Вашингтон и Техеран продолжуваат паралелно со воените операции.

Американската Централна команда, CENTCOM, утрово официјално потврди дека извела нови воздушни напади врз цели во Иран. Соопштението беше објавено кратко откако Кувајт информираше за воздушна закана, по што во земјата се активираа сирени за предупредување поради проектили и беспилотни летала.

Последните настани дополнително ги зголемија стравувањата од поширока регионална ескалација, додека меѓународната заедница внимателно ги следи развојот на ситуацијата и текот на американско-иранските преговори. И покрај зголемените тензии и воените дејствија, Трамп продолжува да инсистира дека дипломатско решение останува достижно и дека преговорите со Техеран се движат во позитивна насока.