Американскиот претседател повторно ги нападна европските членки на НАТО, обвинувајќи ги дека не застанале зад САД во конфликтот со Иран. Американскиот претседател Доналд Трамп повторно отвори фронт со европските сојузници од НАТО, само неколку часа пред пристигнувањето на генералниот секретар на Алијансата, Марк Руте, во Вашингтон.

Говорејќи во Белата куќа, Трамп ги обвини неколку клучни европски држави дека со години се потпираат на американската воена заштита, но не покажале подготвеност да им возвратат на САД кога Вашингтон побарал поддршка во контекст на конфликтот со Иран.

„Со години трошиме огромни пари за да ја заштитуваме Европа“, изјави Трамп, посочувајќи дека кога САД побарале помош, некои од најважните сојузници не застанале на нивна страна.

Американскиот претседател конкретно ги спомена Велика Британија, Германија и Италија.

„Ги замоливме да дојдат, а тие не беа тука за нас“, рече Трамп, без дополнително да објасни на што точно се однесува забелешката.

Изјавата доаѓа во период кога претставници на американската администрација повеќепати ги обвинуваа европските партнери дека не обезбедиле доволна политичка и воена поддршка за американските операции против Иран.

Трамп ја доведе во прашање и американската заштита на Европа

Во своето обраќање, Трамп индиректно ја отвори и темата за безбедносните гаранции што САД им ги обезбедуваат на европските членки на НАТО. Тој нагласи дека Вашингтон издвојува стотици милијарди долари за одбрана и заштита на Европа од потенцијални закани, особено од Русија.

Според Трамп, ако европските сојузници не се подготвени да им помогнат на САД во, како што рече, помали прашања, тогаш и Америка во иднина би можела да го преиспита својот пристап кон сојузничките обврски. Изјавата веројатно дополнително ќе ги зголеми тензиите меѓу Вашингтон и дел од европските престолнини, особено во пресрет на разговорите меѓу Трамп и Руте.

Руте пристигнува во Вашингтон

Генералниот секретар на НАТО, Марк Руте, ќе престојува во Вашингтон од вторник до четврток. За време на посетата се очекува тој да се сретне со Трамп во Белата куќа, како и со други високи претставници на американската администрација.

Разговорите доаѓаат во чувствителен момент за Алијансата, обележан со војната во Украина, тензиите на Блискиот Исток и растечките дебати околу распределбата на безбедносните и финансиските обврски меѓу САД и европските сојузници.