Американскиот претседател Доналд Трамп изјави дека израелскиот премиер Бенјамин Нетанјаху нема друг избор освен да го прифати договорот што Соединетите Американски Држави би можеле да го постигнат со Иран. Во интервју за британскиот весник „Фајненшл тајмс“, Трамп категорично порача дека Израел ќе мора да се усогласи со евентуалниот договор меѓу Вашингтон и Техеран.
„Тој нема никаков избор“, изјави Трамп, алудирајќи на Нетанјаху.
Неговата изјава доаѓа по телефонски разговор со израелскиот премиер, одржан во услови на нова ескалација на тензиите меѓу Израел и Иран. Според американскиот портал „Аксиос“, Трамп пред разговорот најавил дека ќе побара од Нетанјаху да се воздржи од нови одмазднички напади врз Иран.
Тензиите дополнително се зголемија откако Техеран истрела повеќе ракети кон израелски цели, како одговор на израелските напади врз јужните предградија на либанскиот главен град Бејрут. Иранските власти порачаа дека секој долгорочен мировен договор со Соединетите Американски Држави ќе зависи од почитувањето на примирјето во Либан. Таму Израел во март започна воена операција против движењето Хезболах, кое има поддршка од Техеран.
Израел претходно изврши воздушни напади во областа на Бејрут, што беа први такви акции откако САД минатата недела претставија план за примирје во Либан. Подоцна, израелската армија соопшти дека детектирала ракети истрелани од Иран и дека системите за противвоздушна одбрана успешно ги пресретнале. Засега нема официјални информации за материјална штета или жртви на израелска територија.
Во интервју за телевизијата „Фокс њуз“, Трамп истакна дека новите напади не придонесуваат за напредок на преговорите.
„Тоа сигурно нема да им помогне на преговорите. Она што ќе му го предложам на Иран е – ги истрелавте ракетите, доста е. Вратете се на преговарачката маса и склучете договор“, изјави американскиот претседател.
Запрашан за израелските напади врз Бејрут, Трамп кратко одговори: „Не сум задоволен од тоа“.
Според медиумските извештаи, ова бил првиот директен ирански напад врз Израел од стапувањето во сила на примирјето поддржано од Соединетите Американски Држави на 8 април. Новата ескалација ги зголеми стравувањата од поширок регионален конфликт на Блискиот Исток, додека дипломатските напори на Вашингтон за постигнување траен договор меѓу Иран и Израел продолжуваат во исклучително сложени околности.
