Пеколна недела со екстремно високи температури ја зафаќа земјава, а здравствените власти апелираат за зголемена претпазливост. Граѓаните се советуваат да се придржуваат до општите препораки за заштита за да се избегнат ризиците од топлотен удар, дехидратација и други здравствени компликации во текот на топлотниот бран.
Според најавите на Управата за хидрометеоролошки работи (УХМР), под влијание на топла воздушна маса од југ следува период на сончево и многу топло време. Здравствените институции бараат максимална претпазливост и почитување на заштитните мерки за зачувување на здравјето.
Основното правило за заштита за време на екстремни температури е престој во затворени и разладени простории, особено меѓу 10 и 17 часот. Директното изложување на сонце во овој период го зголемува ризикот од сончаница и топлотен удар. Доколку излегувањето е неопходно, задолжително е носење лесна и светла облека од природни материјали (памук, лен), заштитни очила и капа. Се препорачува чест престој во климатизирани или разладени простории. При влегување во возило оставено на сонце, потребно е претходно да се проветри за да се намали температурата во кабината.
Пиењето вода треба да биде редовно и во поголеми количества, дури и кога не се чувствува директна жед. Мора да се избегнуваат алкохолни пијалаци, пијалаци со висок процент на шеќер и кофеин, бидејќи дополнително го забрзуваат процесот на дехидратација. Исхраната треба да содржи полесна храна, главно овошје, зеленчук и супи. Поради високите температури и ризикот од бактериски труења, епидемиолозите советуваат посебно внимание при складирањето и подготовката на храната. Треба да се избегнуваат термички необработени производи, како и кремови и сладоледи со сомнително потекло.
Постарите лица над 65 години, децата, бремените жени и хронично болните спаѓаат во најранливата група при екстремни жештини. Хроничните пациенти, посебно оние со кардиоваскуларни и респираторни заболувања, мора редовно да ја земаат препишаната терапија и да зачестат со проверки кај матичниот лекар при какви било симптоми на слабост.
За работниците што извршуваат физичка работа на отворено, како градежниците и земјоделците, се апелира да се почитуваат законските препораки за реорганизација на работното време и избегнување тежок физички труд во најтоплиот дел од денот.
Според официјалните податоци од УХМР, топлотниот бран дополнително ќе се засили во текот на оваа недела. Максималните дневни температури во поголем дел од земјата ќе се движат од 34 до 40 степени, додека во најтоплите региони, како Повардарието, живата во термометарот ќе достигне и до 41 степен Целзиусов.
Утринските температури исто така ќе бидат високи и на повеќе места нема да се спуштат под 20 степени, што ги дефинира како тропски ноќи. Во Скопје и околината се очекува сончево и многу топло време со дневни температури кои редовно ќе ја надминуваат границата од 38 степени. Зголемената влажност на воздухот дополнително ќе го зголеми чувството на спарина.
