Европа се соочува со еден од најинтензивните топлотни бранови во последните години, а последиците веќе се чувствуваат во повеќе држави. Најтешко погодени се Франција и Шпанија, каде температурите надминуваат 40 степени Целзиусови, а властите преземаат вонредни мерки за заштита на населението. 

Во Франција, метеоролошките служби предупредуваат на исклучително опасен период на екстремни горештини. Во голем дел од земјата е активиран највисок степен на предупредување, а температурите во некои региони достигнуваат и над 40 степени. Поради жештините беа затворени стотици училишта, а дел од железничкиот и јавниот превоз работи со ограничувања. 

Француските власти потврдуваат дека бројот на жртви поврзани директно или индиректно со топлотниот бран расте. Дел од смртните случаи се поврзани со топлотен удар и срцеви проблеми, додека други се случиле при обиди луѓето да се разладат во реки, езера и на плажи. Здравствените служби бележат и зголемен број интервенции поради дехидратација и исцрпеност од високите температури. 

Францускиот претседател Емануел Макрон повика на максимална претпазливост, особено кај постарите лица, хронично болните и децата, нагласувајќи дека земјата минува низ исклучително тежок период. 

Во соседна Шпанија ситуацијата исто така е алармантна. Метеоролозите предупредуваат дека во одредени делови од земјата температурите би можеле да достигнат и до 45 степени Целзиусови. Топлиот бран е предизвикан од маса сув и жежок воздух што пристигнува од Северна Африка и се задржува над Пиринејскиот Полуостров и западна Европа. 

За да се намалат ризиците по здравјето на граѓаните, шпанските локални власти отвораат таканаречени „климатски засолништа“ – јавни простори со климатизација каде луѓето можат бесплатно да престојуваат во најжешките часови од денот. Овие центри се наменети пред сѐ за постари лица, лица со здравствени проблеми и граѓани кои немаат соодветни услови за разладување во своите домови. 

Експертите предупредуваат дека ваквите екстремни топлотни бранови стануваат сѐ почести и поинтензивни поради климатските промени. Според европските и светските климатски организации, Европа останува континентот што се затоплува најбрзо во светот, а рекордните температури сè почесто пристигнуваат уште на самиот почеток на летото.