Општина Тетово ќе доделува еднократна финансиска поддршка за секое дете што ќе биде запишано во прво одделение во училиштата на нејзината територија.

Мерката ја објави советникот од ВМРО-ДПМНЕ во Советот на Општина Тетово, Ангел Карапетров, кој информира дека поддршката ќе изнесува 6.150 денари, односно околу 100 евра по прваче.

Според Карапетров, целта на оваа одлука е да им се помогне на семејствата полесно да го подготват почетокот на новата учебна година, особено во период кога трошоците за училишен прибор, облека и основни потреби за децата се значителен товар за многу родители.

„Првата одлука се однесува на еднократна финансиска поддршка за секое прваче во износ од 6.150 денари, мерка со која се овозможува полесен и поддржан почеток на новата учебна година за најмладите ученици и нивните семејства“, напиша Карапетров.

Покрај финансиската поддршка за првачињата, најавена е и реконструкција на паркот кај Музичкото училиште во Тетово. Според објавата, овој јавен простор треба да добие помодерен изглед и подобри услови за рекреација, особено за децата и младите.

„Втората одлука предвидува реконструкција на паркот кај Музичкото училиште во Тетово, со што овој јавен простор ќе добие нов, помодерен изглед и подобрени услови за рекреација на граѓаните, особено на децата и младите“, стои во објавата.

Одлуката предизвика позитивни реакции на социјалните мрежи, особено кај родителите, бидејќи директната поддршка за првачињата доаѓа пред почетокот на учебната година, кога семејните трошоци традиционално растат.