Летниот период повторно ги отвори старите сообраќајни проблеми во Тетово. Граѓани реагираат на метежот по улиците, недостигот на паркинг-места и бучавата што, како што велат, трае до доцните ноќни часови.

Особено се посочува зголемениот број возила со странски регистарски таблички, кои во летните месеци дополнително го оптоваруваат градот.

Тетовецот Бошко Видоески преку социјалните мрежи побара поголема контрола и ред, оценувајќи дека жителите секојдневно се соочуваат со отежнато движење и нарушен јавен мир.

„Тетово е заложник на возила со странски таблички“

Видоески во својата реакција посочува дека дел од возачите непрописно паркираат, создаваат бучава, турираат и се тркаат по улиците.

„Тетово е заложник на возила со швајцарски, германски и со италијански регистарски таблички“, напиша тој.

Според него, не може да се смета за нормално град што не е туристички да функционира како туристичко место без ред и контрола.

„И во таквите градови постои ред. Туризмот не смее да биде на штета на жителите што живеат тука цела година“, напиша Видоески.

Недостиг на паркинг и бучава до доцна во ноќта

Граѓаните, според реакциите, со месеци се соочуваат со проблеми во секојдневното движење низ градот.

Како најчести проблеми се наведуваат тешкото пристигнување до домовите, недостигот на паркинг-места, непрописното паркирање и бучавата од улиците.

Видоески упати критики и кон надлежните институции, оценувајќи дека контролите не се доволни и дека е потребно поголемо присуство на службите за да се воспостави ред.

Граѓаните бараат поголема контрола

Жителите бараат решенија што ќе овозможат нормално функционирање на градот, особено во летните месеци кога сообраќајниот притисок е најголем.

Нивното барање е институциите да обезбедат поголема контрола, почитување на сообраќајните правила и санкционирање на сите што го нарушуваат јавниот ред, без разлика дали се со домашни или странски регистарски таблички.