Користењето паметни телефони може за 1,5 пати да го зголеми ризикот од појава на главоболка кај децата, а кај оние кои имаат генетска предиспозиција за мигрена, долгото користење на дигитални уреди може да придонесе болеста да се појави порано и нападите да станат почести.

Ова го изјавила Галина Мојсак, невролог во Федералниот центар за неврохирургија во Новосибирск и вонреден професор на Катедрата за невронауки на Новосибирскиот државен универзитет.

„Според истражувањата, ризикот од развој на каква било главоболка кај децата е еден и пол пати поголем при користење паметни телефони“, изјавила Мојсак.

Таа предупредува дека мигрената кај најмладите често не се препознава навреме. Симптомите неретко се припишуваат на училишен замор или преоптовареност, иако првите напади можат да се појават уште на возраст од три до пет години.

Неврологот објаснува дека симптомите кај децата можат значително да се разликуваат од оние кај возрасните. Наместо типичната пулсирачка болка на едната страна од главата, мигрената може да се манифестира преку таканаречени претходници или еквиваленти на мигрена.

Меѓу нив се повторливи и интензивни епизоди на повраќање без очигледна инфекција или стомачно заболување, но и ненадејни напади на вртоглавица.

„Дури по извесно време, понекогаш по неколку месеци или години, овие симптоми можат да прераснат во класична главоболка“, наведува специјалистката.

Затоа, родителите не треба да ги игнорираат повторливите епизоди на мачнина, лошо расположение или други необјаснети тегоби, особено ако се појавуваат по замор или подолго изложување на дигитални екрани.

Во таков случај, Мојсак советува навремена консултација со детски невролог.

Како една од основните немедикаментозни мерки за заштита на нервниот систем, таа ја издвојува редовната дневна рутина, ограничувањето на познатите предизвикувачи и легнувањето во приближно исто време секоја вечер.