Кинескиот претседател Ши Џинпинг го предупреди американскиот претседател Доналд Трамп дека прашањето за Тајван останува најчувствителната точка во односите меѓу Пекинг и Вашингтон и дека погрешен пристап може да доведе до судир меѓу двете сили. Предупредувањето беше испратено за време на средбата на двајцата лидери во Пекинг, во услови на зголемени геополитички и трговски тензии.

Ши, според кинеските државни медиуми, му порачал на Трамп дека Тајван е „најважното прашање“ во односите меѓу Кина и САД. Тој предупредил дека ако темата се третира погрешно, двете земји би можеле да влезат во „судир, па дури и конфликт“, што би ги довело билатералните односи во опасна фаза.

Кина го смета Тајван за дел од својата територија и не ја исклучува можноста за обединување со сила, додека Тајпеј ги отфрла кинеските претензии. САД формално не го признаваат Тајван како независна држава, но остануваат негов најважен безбедносен партнер, вклучително и преку продажба на оружје, што редовно предизвикува остри реакции од Пекинг.

И покрај остриот тон околу Тајван, Ши порача дека Кина и САД треба да бидат „партнери, а не ривали“. Тој истакнал дека стабилните односи меѓу двете најголеми светски економии се важни не само за двете земји, туку и за глобалната стабилност, додавајќи дека соработката им користи на сите, додека конфронтацијата носи штета.

Трамп, пак, настапи со помирлив тон, оценувајќи дека односите меѓу Вашингтон и Пекинг може да бидат „подобри од кога било“. Средбата во Големата сала на народот беше проследена со свечена церемонија, ракување пред делегациите и разговори за повеќе чувствителни теми, меѓу кои трговијата, Иран, Украина, технологијата и безбедноста.

Посетата на Трамп на Кина е прва посета на американски претседател на Пекинг по речиси една деценија. Иако двете страни испратија пораки за стабилизација на односите, предупредувањето на Ши покажа дека Тајван останува најголемата можна точка на ескалација меѓу САД и Кина.