Светска здравствена организација соопшти дека едно лице од САД, кое претходно имало нејасен резултат на тестирање за хантавирус, дополнително било потврдено како негативно. Со ова, вкупниот број потврдени случаи на хантавирус во светот е намален од 11 на 10. Информацијата ја објави Марија ван Керхове, директорка на Одделот за подготвеност и превенција од епидемии и пандемии при СЗО.

„Дополнително добивме потврда од САД дека тоа лице било негативно“, изјави таа.

Под надзор се 41 лице во САД

И покрај намалениот број случаи, американскиот Центар за контрола и превенција на болести соопшти дека во моментов се следи здравствената состојба на 41 лице поради можност за зараза со хантавирус. На сите им било препорачано да останат дома и да избегнуваат контакти во текот на 42-дневен период на следење.

Дејвид Фитер, кој раководи со одговорот на епидемијата, изјави дека потенцијално изложените лица доаѓаат од три главни групи: патници кои неодамна биле репатрирани, лица кои го напуштиле крузерот пред откривањето на епидемијата и патници кои можеби биле изложени на вирусот за време на летови со симптоматски случаи.

Епидемијата започна на крузер

Епидемијата на анскиот сој на хантавирус избувна во април на холандскиот крузер MV Hondius за време на патување од Аргентина кон Зеленортски Острови. СЗО предупредува дека бројот на случаи би можел дополнително да расте поради долгиот инкубациски период, кој трае меѓу шест и осум недели, како и поради блиските контакти меѓу патниците за време на патувањето.

Хантавирус е ретка, но потенцијално опасна вирусна инфекција која најчесто се пренесува преку контакт со заразени глодари или нивни измет. Одредени соеви, како анскиот хантавирус, можат да се пренесуваат и меѓу луѓе, што дополнително ја зголемува загриженоста кај здравствените власти.