Од 24 до 29 јуни 2026 година, Струга повторно ќе стане центарот на светската поезија со јубилејното 65. издание на „Струшки вечери на поезијата“, една од најреномираните поетски манифестации во светот. Фестивалот годинава се одржува под мотото „Каде што живее поезијата“ и носи шест дена исполнети со книжевност, инспирација и културна размена.

Во градот Струга ќе се соберат околу 70 поети, преведувачи, критичари и други книжевни работници од Македонија и од целиот свет. Настаните ќе се одвиваат покрај бреговите на Охридско Езеро и долж реката Црн Дрим, простор кој со децении е препознатлив како симболичен дом на поетската уметност. Во рамки на фестивалската програма ќе бидат промовирани 14 изданија на Националната установа „Струшки вечери на поезијата“, а публиката ќе има можност да присуствува на средби со современи автори и разновидни книжевни настани.

Свеченото отворање е закажано за 24 јуни, датум кој има посебна симболика бидејќи се поклопува со 165-годишнината од објавувањето на „Зборникот на народни умотворби“ на браќата Миладиновци (1861, Самобор). Токму затоа фестивалот годинава се враќа во јуни, во период кога се одржуваат и други големи европски поетски фестивали.

На јубилејното издание ќе бидат доделени и највисоките признанија: „Златен венец“ на холандската поетеса Анеке Брасинга и наградата „Мостови на Струга“ на британскиот поет Даниел Хајндс. Меѓу учесниците се автори од повеќе континенти, меѓу кои од Македонија, Грција, Турција, Бугарија, Австралија, Албанија, Холандија и Италија. Организаторите најавуваат дека ова издание ќе донесе обновена енергија и враќање на професионалниот меѓународен фестивалски формат. Струга, како што велат, останува отворена сцена каде поезијата ги поврзува јазиците, културите и генерациите, создавајќи нови страници од својата долгогодишна книжевна традиција.