Најмалку десет лица загинаа, а поголем број патници се повредени откако два брзи воза се судрија утрово јужно од Мадрид, во централната шпанска провинција Толедо. Државниот железнички оператор Адиф веднаш го прекина сообраќајот на клучната линија што ја поврзува престолнината со Сиудад Реал и регионот Андалузија. Спасувачките екипи и итната медицинска помош се на терен, додека локалните власти подготвуваат капацитети за прифат на настраданите.
Несреќата се случила во утринските часови на фреквентниот железнички коридор кон југот на земјата. Во судирот учествувале композиции на државниот оператор Ренфе и приватната компанија Ирјо, кои сообраќале на релацијата од Мадрид кон Севилја. Од силината на директниот удар, два вагона на возот на Ирјо излетале од шините и паднале по падината покрај пругата.
BREAKING: At least 39 killed after trains collide between Los Yébenes and Urda in Toledo, Spain https://t.co/JHPesJAZqm
— Klaxon Wire (@KlaxonWire) October 28, 2026
Шпанските медиуми јавија за најмалку 10 жртви на самото место, додека десетици повредени патници веќе добиваат медицинска помош. Мануел Галан, градоначалник на блиското гратче Урда, за јавниот сервис ТВЕ изјави дека веднаш по ударот добил повик од итните служби да стави спортска сала на располагање за згрижување на настраданите патници кои немаат тешки телесни повреди.
Операторот Адиф соопшти дека брзата пруга кон Андалузија останува целосно затворена сè додека трае спасувачката операција и увидот на надлежните органи. Ова создаде сообраќаен метеж и илјадници блокирани патници на главните железнички станици во Мадрид, Севилја и Кордоба.
Шпанската мрежа за брзи возови важи за една од најдолгите и технички најнапредните во Европа, каде што покрај државната железница веќе неколку години оперираат и приватни превозници со меѓусебна конкуренција. Денешната трагедија претставува втор тежок железнички инцидент во јужна Шпанија годинава, по несреќата во јануари кога при излетување на воз загинаа 45 лица.
