Европа официјално влезе во нова, клучна фаза од еден од најголемите инфраструктурни проекти во светот – изградбата на Бренер базниот тунел, кој се гради под Алпите и по завршувањето ќе биде најдолгиот подземен железнички тунел на планетата. Новата фаза започна откако огромната машина за дупчење тунели, наречена „Катрин“, започна со ископ на тунелот Гардена на јужниот пристап кон коридорот Бренер, меѓу Италија и Австрија.
Машина долга 144 метри
„Катрин“ е импресивна TBM машина (Tunnel Boring Machine) долга 144 метри, со глава за дупчење со дијаметар од речиси 10 метри. Таа е специјално дизајнирана за екстремно сложени геолошки услови какви што се Алпите. Машината може да работи во два режима, зависно од тврдоста и структурата на карпите низ кои минува, што е клучно за ваков тип планински пробив.
„Катрин“ сега влегува во најсложениот дел од проектот, по завршувањето на пристапниот тунел Фунес, кој овозможи директен влез во планинскиот масив. Во следната фаза се планира ископ на повеќе од 16 километри тунел, како и поставување околу 9.000 бетонски сегменти за обложување на тунелските цевки.
Стратешки европски коридор
Бренер базниот тунел е дел од поширок европски транспортен коридор кој ја поврзува Скандинавија со Медитеранот. Целиот систем ќе има должина од околу 64 километри и ќе стане најдолгиот железнички подземен тунел во светот.
Целта на проектот е значително забрзување на железничкиот сообраќај, зголемување на капацитетите за товарен транспорт и пренасочување на милиони тони стока од патишта на железница. ЕУ и националните влади го гледаат проектот како клучен чекор за намалување на сообраќајниот метеж и емисиите на CO₂ на една од најоптоварените рути во Европа.
Инвестиција вредна милијарди евра
Јужниот пристап кон тунелот, меѓу Фортеца и Понте Гардена, е првата фаза од четирипругна железничка линија на релација Минхен – Верона.
По неговото завршување, патувањето меѓу Италија и Австрија ќе биде значително побрзо, додека железницата ќе преземе голем дел од товарниот транспорт кој денес се одвива по патиштата преку Алпите.
Европските медиуми веќе го опишуваат Бренер како еден од најважните инфраструктурни проекти на иднината, со потенцијал целосно да ја промени логистиката меѓу северна и јужна Европа.
