Србија се приближува кон можни предвремени парламентарни избори на 18 или 25 октомври, а најголемото прашање е како ќе настапи опозицијата. Според најавите на претседателот Александар Вучиќ, изборите би се одржале во втората половина на октомври. Студентското движење останува на ставот дека на изборите ќе настапи самостојно и веќе води неформална предизборна кампања.

Во опозицискиот блок, пак, се оформуваат неколку различни колони.

Демократската партија и Зеленолевиот фронт најавија поддршка за листата што ќе ја предложи студентското движење. Во меѓувреме, четири партии Странка на слободата и правдата, СРЦЕ, Движењето на слободни граѓани и Граѓанското движење Солидарност ја формираа Платформата за европска Србија.

Во тек се разговори и за уште еден поширок опозициски блок, во кој би можеле да се најдат Еколошкото востание, Народното движење на Србија, Ново лице на Србија и групата на Драган Милиќ.

Паралелно, коалицијата НАДА, составена од Нови ДСС и Монархистите, како и партијата „Ми – сила на народот“ на Бранимир Несторовиќ, исто така најавуваат учество на изборите.

Според истражувањето на ЦРТА и Democracy Action Lab од јуни, меѓу определените гласачи студентската листа има поддршка од 44,9 отсто, додека Српската напредна партија е на 35,7 отсто, а СПС на 3,8 отсто.

Политичкиот аналитичар Дејан Бурсаќ предупредува дека опозицијата треба да излезе на избори само доколку е сигурна дека може да го мине изборниот праг и да придонесе за политичка промена. Според него, меѓусебните конфликти и јавните напади би можеле да го намалат ентузијазмот за промени.

Со изборите можеби остануваат само два месеца, но опозицискиот распоред сè уште не е конечен – а токму поделбите би можеле да бидат еден од клучните фактори во октомвриската трка.