Српскиот претседател Александар Вучиќ објави дека „многу кратка“ задолжителна воена служба ќе започне во март 2027 година.

Тој ова го изјави во недела, за време на обиколката на вооружувањето и опремата на воениот аеродром „Миленко Павловиќ“ во Батајница, во близина на Белград.

„Пред тоа ќе започнат бирократските процедури, а во март ќе започнеме со отслужување на многу кратка воена служба. Ова дополнително ќе ги зајакне нашите одбранбени способности“, рече Вучиќ.

Воената служба ќе трае 75 дена

На почетокот на годината, Вучиќ најави дека ќе се воведе задолжителна воена служба и дека таа ќе трае 75 дена за мажи под 30 години.

Со ова, Србија повторно се враќа кон модел на задолжителна воена служба, по повеќе од една деценија професионална армија.

Српската армија е професионална од 2011 година

Српската армија официјално стана професионална на почетокот на 2011 година, кога стапи во сила парламентарна одлука за суспендирање на задолжителната воена служба.

Редовната воена служба тогаш беше заменета со доброволна служба, а армијата почна да се пополнува со професионални војници и офицери, објавува Нова.рс.