Руското Министерство за одбрана соопшти дека системите за противвоздушна одбрана во текот на ноќта пресретнале и уништиле 315 украински беспилотни летала. Информацијата доаѓа по серија предупредувања за дронови над руска територија и во близина на Москва.

Градоначалникот на Москва, Сергеј Собјанин, изјави дека руските сили уништиле и дрон што се движел кон главниот град. Според руските власти, службите биле испратени на местата каде што паднале остатоци од соборените летала.

Во истиот период, Русија извршила воздушни напади врз повеќе украински региони, меѓу кои и пристанишниот град Измаил во Одеската област, каде биле оштетени објекти од пристанишната инфраструктура, објави Reuters. Украински локални власти соопштиле и за напади во Харкив, Днипропетровск, Миколаив и Запорожје.

Москва и Киев сè почесто разменуваат масовни напади со дронови, додека мировните разговори остануваат без видлив напредок. Русија редовно објавува бројки за соборени украински дронови, но тие тврдења не можат независно да се потврдат во моментот на објавување.