Сè повеќе европски туристички дестинации се соочуваат со проблемот на масовниот туризам, загадувањето и притисокот врз локалната инфраструктура. Додека некои воведуваат туристички такси, ограничувања и казни, други се одлучуваат за поинаква стратегија – да ги наградат туристите кои се однесуваат одговорно.
Еден од најпознатите примери е Копенхаген, каде што иницијативата CopenPay им овозможува на посетителите да добијат различни погодности доколку направат нешто корисно за животната средина. Туристите можат да добијат, меѓу другото, бесплатно изнајмување велосипед, возење со брод или оброк, доколку учествуваат во активности како собирање отпад, работа во заеднички градини или користење јавен превоз.
Идејата е едноставна, наместо одржливото однесување да биде обврска, тоа се претвора во нешто од кое туристот директно има корист.
Попусти за оние што се грижат за природата
Сличен пристап има и Националниот парк Ексмур во Велика Британија. Посетителите можат да бидат наградени доколку собираат отпад, забележуваат диви животни, пристигнуваат со велосипед или јавен превоз и промовираат позитивни пораки за природата. За учеството можат да добијат 20 отсто попуст во три информативни центри за посетители.
Одржливото патување се наградува и во европските алпски региони. Во италијанската Via Lattea, туристите кои пристигнуваат со воз во Oulx можат да добијат 20 до 25 отсто попуст на ски-карти.
Во Франција, патниците кои избираат воз наместо автомобил можат да добијат попусти за повеќедневни ски-карти, изнајмување опрема, часови по скијање, сместување и други активности.
Возот може да ви донесе и бесплатен влез во музеи
Швајцарија оди чекор понатаму со својот систем на јавен превоз. Корисниците на Swiss Travel Pass можат да добијат бесплатен влез во повеќе од 500 музеи, како и поевтини билети за бројни планински железници. Во Нормандија, туристите кои пристигнуваат со воз, автобус или велосипед можат да добијат најмалку 10 отсто попуст за голем број туристички и културни атракции.
Погодностите важат за замоци, музеи, споменици и паркови, но и за активности како изнајмување велосипеди, кану и други искуства.
Бесплатно кафе за чистење отпад
Слични експерименти има и во Германија. Во Бремен, преку програмата BremenPay, туристите кои пристигнувале со воз, користеле велосипед или го продолжувале престојот можеле да добијат бесплатно кафе, туристичка тура или попуст на влезници. Берлин, исто така, тестирал сличен пристап, со награди за туристи кои учествуваат во собирање отпад, користат велосипеди и прават други активности корисни за градот.
Во Лондон, учесниците во активности за чистење во рамките на иницијативата „Јули без пластика“ можат да бидат наградени со бесплатен пијалак.
Следен чекор – туризам што ја обновува природата
Слична идеја се разгледува и во Хелсинки, каде што фокусот е ставен на таканаречениот регенеративен туризам – концепт според кој посетителите не само што треба да нанесуваат помала штета, туку и да придонесат за подобрување на местото што го посетуваат. Туристите би биле поттикнувани да користат јавен превоз и велосипеди, а за таквото однесување би можеле да добијат бесплатни оброци, поевтини излети и други туристички искуства.
Трендот покажува промена во начинот на кој европските дестинации се обидуваат да се справат со масовниот туризам: наместо само да им кажат на туристите што не смеат да прават, тие почнуваат да им нудат конкретна причина да се однесуваат поодговорно.
