Властите во американската сојузна држава Џорџија го закажаа погубувањето на 53-годишниот Стејси Хамфрис за 16 септември. Осуденикот ќе биде погубен со смртоносна инјекција во државниот затвор поради убиство на две агентки за недвижности, извршено пред повеќе од две децении во предградие на Атланта. Ова ќе биде прва извршена смртна казна во оваа сојузна држава во текот на оваа година.

Извршувањето на смртните казни во Џорџија беше во застој подолг период поради правни спорови поврзани со договор склучен за време на пандемијата на коронавирусот. Одбраната тврдеше дека тој договор привремено ги штити осудениците на смрт од егзекуција, па последната смртна казна во државата беше спроведена во март 2024 година.

Погубувањето на Хамфрис првично беше закажано за декември минатата година, но беше одложено. Неговите адвокати побараа изземање на двајца членови на државниот Одбор за помилување и условен отпуст, тврдејќи дека тие се во судир на интереси бидејќи биле професионално поврзани со неговото првично судење.

Судијата Роберт Мекбурни привремено го запре процесот за да ги разгледа приговорите на одбраната. Откако Врховниот суд на Џорџија одби да ја разгледа жалбата, адвокатите поднесоа барање до Врховниот суд на САД, кој сè уште треба да донесе конечна одлука за случајот.

Злосторството се случи на 3 ноември 2003 година во Паудер Спрингс, на околу триесет километри северозападно од Атланта. Според судските списи, Хамфрис влегол во канцеларијата за продажба на недвижности, каде што им ги одзел парите на Синди Вилијамс (33) и Лори Браун (21), а потоа пукал во нив. Полицијата го уапси два дена подоцна во сојузната држава Висконсин по брза потера со автомобили.