Американскиот претседател Доналд Трамп стави потпис на сеопфатниот закон за санкции со кој директно се удира врз руската економија и финансирањето на војната во Украина. Новите санкции за руската енергетика предвидуваат казнени царини до 100 отсто за земјите што купуваат нафта и гас од Москва, мерки против претседателот Владимир Путин, руските банки и таканаречената флота во сенка.
Законот официјално насловен како „Закон на Линдзи О. Греам за санкционирање на Русија и Иран од 2026 година“ му дава широки овластувања на Трамп. Документот на 48 страници овозможува воведување увозни царини до 100 отсто за петте најголеми купувачи на руски енергенти. Оваа мерка првенствено се однесува на Кина и Индија, кои презедоа најголем дел од рускиот извоз по воведувањето на првичните западни ограничувања.
Податоците на Центарот за истражување на енергија и чист воздух покажуваат дека од декември 2022 до август 2026 година Кина купила 50 отсто од вкупниот руски извоз на сурова нафта. Индија учествува со 37 отсто. Турција и Европската Унија имаат удел од по пет проценти, при што европскиот увоз постојано опаѓа. Законот остава простор за исклучок единствено за државите што увезуваат под 15 отсто од потребите за гас од Русија и активно работат на намалување на зависноста.
Мерките не застануваат само на царините кон трговските партнери на Москва. Текстот содржи директни санкции против рускиот претседател Владимир Путин, високи државни функционери, како и водечки банки и финансиски институции. Посебна цел е руската „флота во сенка“, составена од танкери со сомнителна регистрација кои со години го заобиколуваат меѓународниот таван на цените на нафтата.
На барање на Трамп, санкциите се проширени и врз иранскиот енергетски сектор и индустријата за вооружување, со што се таргетира воената соработка меѓу Техеран и Москва. Демократскиот сенатор Ричард Блументал го опиша законот како пакет што ќе го задуши воениот механизам на Путин. Поддршка упати и украинскиот претседател Володимир Зеленски, нарекувајќи го усвојувањето на законот силен одговор на континуираните руски ракетни удари врз украинските градови.
Овој законски акт е именуван во чест на републиканскиот сенатор Линдзи Греам, кој почина на 11 јули годинава на 71-годишна возраст, веднаш по враќањето од посета на Киев. Греам со месеци вршеше притисок во Вашингтон за поостри економски мерки против Кремљ и беше еден од најгласните заговорници за поддршка на Украина на Капитол Хил. Законот претходно помина во Претставничкиот дом, а со потписот на Трамп мерките стапуваат во сила.
