Американскиот претседател Доналд Трамп и кинескиот претседател Си Џинпинг го завршија тридневниот самит во Вашингтон со пораки за стабилност и продолжување на дијалогот, но без значителен напредок околу трговијата, Тајван, вештачката интелигенција и односите на Пекинг со Иран.

Најконкретниот резултат од средбите е продолжувањето на американско-кинеското трговско примирје за уште два месеца. Договорот требаше да истече на 10 ноември, а дополнителниот период треба да им овозможи на двете страни да преговараат за поширок трговски пакет.

Американскиот трговски претставник Џејмисон Грир изјави дека се постигнати договори за изземање на одредени категории производи од трговските спорови. Меѓу нив се дел од американските земјоделски производи и медицинската опрема извезувани во Кина, како и потрошувачки и други нечувствителни производи што САД ги увезуваат. Подетални информации се најавени за понеделник.

Лидерите разговарале и за војните во Иран и Украина, состојбата на Корејскиот Полуостров и развојот на вештачката интелигенција. Според американскиот амбасадор во Кина, Дејвид Пердју, Трамп побарал од Си Пекинг да не обезбедува директна или индиректна помош за Иран. Кина јавно повика на враќање на преговорите, но не објави детали за евентуалните преземени обврски.

Прашањето за Тајван остана нерешено. Пекинг побара Вашингтон појасно да се спротивстави на независноста на островот и да ја запре продажбата на оружје, додека американската страна не објави промена на досегашната политика.

Си ја опиша билатералната врска како однос на „стратегиска стабилност врз основа на почитување, правичност и реципроцитет“. Трамп, пак, рече дека средбите ќе донесат придобивки за американските земјоделци, но не претстави конкретни бројки.

Најавено е дека двајцата претседатели ќе се сретнат уште двапати до крајот на годината – на форумот на Азиско-пацифичката економска соработка во Кина во ноември и на самитот на Г20 во Мајами во декември.