Американскиот борбен хеликоптер AH-64 „Апачи“, кој се урна во близина на Ормускиот теснец, најверојатно бил погоден од ирански беспилотен леталник од типот „Шахид“, објави порталот „Аксиос“, повикувајќи се на неименуван американски функционер. Според информациите, инцидентот се случил за време на патролна мисија во стратешки важниот поморски коридор. Од американската Централна команда (CENTCOM) соопштија дека двајцата членови на екипажот биле успешно спасени во рок од два часа по падот на леталото и се наоѓаат во добра здравствена состојба.

Американскиот претседател Доналд Трамп го обвини Иран за нападот и најави дека Вашингтон ќе одговори на соборувањето на хеликоптерот.

„Тукушто бев информиран од нашата војска дека Иранците соборија еден од нашите високософистицирани хеликоптери ‘Апачи’ што патролираше во Ормускиот теснец. Двајцата пилоти се безбедни и неповредени. Соединетите Држави мора да одговорат на овој напад“, напиша Трамп на својата социјална мрежа Truth Social.

На изјавите на американскиот претседател реагираше и иранскиот министер за надворешни работи Абас Аракчи. Тој порача дека Ормускиот теснец не е под американска јурисдикција и дека странското воено присуство во близина на иранските територијални води претставува безбедносен ризик.

Аракчи истакна дека Техеран и натаму ја претпочита дипломатијата како средство за решавање на кризите, но додаде дека иранската војска покажала дека е подготвена да реагира кога смета дека нејзината безбедност е загрозена. Инцидентот дополнително ги зголемува тензиите меѓу САД и Иран во регионот на Персискиот Залив, каде што Ормускиот теснец останува една од најважните и најчувствителни точки за глобалното снабдување со нафта.