Американската војска погоди три нафтени танкери поврзани со Иран откако кон два американски воени брода беа истрелани балистички ракети, соопшти Централната команда на САД (CENTCOM). Според официјалниот извештај, силите на Вашингтон успеале да ги избегнат нападите насочени кон нивниот носач на авиони и ракетен разурнувач без ниеден повреден војник, по што веднаш следел прецизен одговор врз иранската поморска нафтена логистика во регионот.
Според деталите што ги објави CENTCOM, операциите се воделе на три одделни локации. Еден танкер во близина на островот Харг е „трајно онеспособен“, истата судбина ја има и втор брод лоциран во близина на стратешкиот Ормутски Теснец, додека третиот танкер во Оманскиот Залив е целосно уништен.
Иранските државни медиуми претходно признаа дека нивен танкер бил погоден во близина на островот Харг, но официјален Техеран засега одбива да ги потврди или коментира лансирањата на ракети врз американските воени пловни објекти.
Воената команда на САД испрати директно предупредување до Иранската револуционерна гарда (IRGC) дека секој следен напад ќе значи директен удар врз економијата на земјата.
„Ако пукате на два наши брода, ќе наметнеме уште поголем економски трошок со уништување на три ваши танкери. Нема да се двоумиме да ги браниме американските сили и, ако биде потребно, да ја уништиме ограничената и изложена иранска флота на нафтени танкери“, изјави командантот на CENTCOM, адмирал Бред Купер.
