Фудбалската репрезентација на Босна и Херцеговина го заврши настапот на Светското првенство, откако во шеснаесетфиналето загуби со 2:0 од селекцијата на Соединетите Американски Држави. Американците до победата стигнаа со головите на Фоларин Балогун во 45. и Малик Тилман во 82. минута и во осминафиналето ќе се соочат со Белгија.

Босна и Херцеговина подобро го отвори натпреварот и уште во првата минута избори корнер, а најголемата шанса во воведниот дел ја имаше Керим Алајбеговиќ, кој директно од корнер го натера американскиот голман Мет Фриз со крајни напори да интервенира.

САД првпат сериозно се закани преку Кристијан Пулишиќ, а во 31. минута на Балогун му беше поништен гол поради офсајд. Сепак, во самиот финиш на првото полувреме Американците поведоа. По една долга топка, Стјепан Радељиќ несреќно ја оттурна, а по одбивањето до Балогун, напаѓачот на САД со малку среќа погоди за 1:0.

Вториот дел започна со нов проблем за Босна и Херцеговина, откако капитенот Един Џеко поради повреда мораше да ја напушти играта во 51. минута. Во 63. минута Балогун заработи директен црвен картон по остар старт, па Босна и Херцеговина речиси половина час играше со фудбалер повеќе. Сепак, избраниците на Сергеј Барбарез не успеаја да создадат посериозни шанси против дисциплинираната американска одбрана.

Конечните 2:0 ги постави Малик Тилман во 82. минута со прецизен удар од слободен удар. Голманот Никола Васиљ ја допре топката, но не успеа да ја спречи да заврши во мрежата. До крајот Босна и Херцеговина се обиде да го намали резултатот, но ударите на Алајбеговиќ и Махмиќ не беа доволно прецизни.