Авион на Ryanair што летал од Солун кон Меминген бил принуден да се врати во Грција по инцидент што се случил за време на летот, додека леталото се наоѓало над Северна Македонија. Според информациите што ги објавија повеќе медиуми, проблемот бил поврзан со сериозен дефект на моторот, при што фрагмент удрил во прозорецот покрај еден од патниците.
Повреден бил патник кој седел до прозорецот, а по слетувањето бил пренесен на лекарски преглед во Солун. Според првичните информации, се активирале и маските за кислород, но не било регистрирано пробивање на трупот на авионот.
Екипажот го забележал проблемот додека авионот летал над Северна Македонија и донел одлука да се врати на аеродромот „Македонија“ во Солун, бидејќи дефектот не можел да се реши за време на летот.
По прогласувањето вонредна состојба, на аеродромот биле активирани стандардните процедури за итни случаи. Во состојба на готовност биле ставени пожарникари, амбулантни возила, полиција и други служби.
Авионот слетал безбедно во Солун, по што бил преместен во одредена зона на аеродромот. Патниците биле вратени на терминалот.
Четворица патници биле однесени во болница како мерка на претпазливост за медицински прегледи. Поголемиот дел од нив биле отпуштени, додека еден патник останал под надзор за дополнителни тестови.
Од Ryanair соопштија дека летот од Солун до Меминген се вратил назад кратко по полетувањето, откако дошло до проблем со прозорецот на патник во авионот. Компанијата наведе дека леталото слетало нормално, а еден патник побарал и добил медицинска помош на земја во Солун.
За да се намали доцнењето, авиокомпанијата организирала заменски авион за патниците да го продолжат патувањето кон Меминген. Според соопштението, заменскиот лет полетал од Солун во 9:53 часот.
Инцидентот предизвика внимание и во Македонија, бидејќи проблемот бил забележан додека авионот летал над македонска територија. Сепак, најважно е дека авионот безбедно се вратил во Солун и дека не биле пријавени потешки последици кај патниците.
