Посетата на украинскиот претседател Володимир Зеленски на Белград и неговиот разговор со српскиот претседател Александар Вучиќ предизвика бран објави во руските медиуми. Во фокусот на државните и прорежимските портали во Москва се најдоа пораките на Вучиќ за поддршка на територијалниот интегритет на Украина, како и прашањата за можната воена и европска соработка меѓу двете земји.

Рускиот портал „Газета.ру“ во својата анализа ја истакна изјавата на Вучиќ дека Србија останува приврзана кон Повелбата на Обединетите нации и дека го почитува територијалниот интегритет на Украина. Руските аналитичари оваа позиција ја толкуваат како јасен знак до западните партнери, проценувајќи дека српските власти настојуваат да ја потврдат соработката со Киев и покрај традиционалните врски со Москва.

Покрај принципиелната поддршка за границите на Украина, во фокусот на руските медиуми се најде и најавата за нова хуманитарна помош, како и поддршката за евроинтеграцискиот процес на Киев.

Државната агенција „РИА Новости“ стави посебен акцент врз прашањето за воена соработка меѓу Белград и Киев. Иако српскиот претседател изјави дека за таква тема не се разговарало на средбата, руските медиуми со внимание ја пренесоа забелешката дека идните односи по завршувањето на конфликтот остануваат отворено прашање.

Истовремено, медиумите како „Известија“ го подвлекуваат фактот што српската страна јасно ја повтори поддршката за украинскиот територијален интегритет во присуство на Зеленски, што во Москва се анализира како важен политички сигнал во рамки на балканското балансирање меѓу Истокот и Западот.