Најмалку пет лица загинаа, а 20 се повредени во рускиот напад врз Запорожје, додека ракетни удари и експлозии се регистрирани и во Киев и во други украински градови.

Русија во текот на ноќта изведе нов бран ракетни напади врз Украина, при што повторно беа употребени балистички ракети. Најтешко е погоден Запорожје, каде што, според локалните власти, загинале најмалку пет лица, а 20 се повредени.

Шефот на регионалната воена управа Иван Федоров соопшти дека во Запорожје биле погодени индустриски објекти и инфраструктура. Нападот предизвикал штета на повеќе локации, а спасувачките екипи биле испратени на терен.

Во Киев, пак, биле слушнати силни експлозии. Градоначалникот Виталиј Кличко ги повика жителите да останат во засолништата додека траела опасноста и додека итните служби интервенирале на терен. Во првичните информации се наведува дека најмалку едно лице е повредено во главниот град.

Украинските воздушни сили предупредиле и на ракетна опасност за други градови. Балистички закани биле регистрирани кон Суми, Харков и Чернихив.

Украина повторно се соочува со проблемот со пресретнувачките ракети

Новиот напад доаѓа во момент кога Украина се соочува со сериозен недостиг на пресретнувачки ракети за противвоздушната одбрана. Системите „Патриот“ се меѓу најефикасните средства со кои Украина се обидува да се заштити од балистички ракети, но нивната ефикасност зависи и од достапноста на пресретнувачки ракети.

Токму балистичките ракети претставуваат особено тежок предизвик за противвоздушната одбрана поради нивната голема брзина и краткото време за реакција. Украина располага со неколку системи „Патриот“, но украинските власти со недели предупредуваат дека резервите на пресретнувачки ракети се ограничени.

Стравувањата во Киев се дека Москва би можела дополнително да ги засили ракетните напади во пресрет на зимата, кога евентуалните удари врз енергетската и друга критична инфраструктура би можеле дополнително да ги влошат условите за живот на милиони луѓе. Нападот од ноќта меѓу 10 и 11 август е уште еден показател дека, и покрај дипломатските напори и разговорите за можен прекин на огнот, воздушната војна над Украина продолжува со несмалено темпо.